មណ្ឌលគិរី៖ រូបភាពវីដេអូររថយន្ត lexus 470 បានដឹកឈើចេញពីតំបន់មេម៉ង់មកទម្លាក់នៅក្រុងសែនមនោរម្យ ត្រូវបានចែកចាយបន្តពេញក្នុងបណ្តាញសង្គម ធ្វើឲ្យមានការភ្ញាក់ផ្អើលជាខ្លាំងចំពោះបញ្ហាមហន្តរាយព្រៃឈើ នៃដែនជម្រកសត្វនៅក្នុងខេត្តមណ្ឌលគិរី។
ប្រភពបានរាយការណ៍ថា រថយន្ត Lexus 470 នោះ បានដឹកឈើតាំងពីមុនចូលឆ្នាំខ្មែរ រហូតដល់ពេលបច្ចុប្បន្ននេះ ដោយមិនអាជ្ញាធរពាក់ព័ន្ធណាមួយធ្វើអីលោកនោះទេ ព្រោះអាងអំណាចមន្ត្រីធំនៅខេត្តមណ្ឌលគិរី ទើបគ្មាននរណាហ៊ានប៉ះពាល់។
អភិបាលខេត្តមណ្ឌលគិរី លោក ថង សាវុន បានដឹងអំពីមហន្តរាយព្រៃឈើដែលពួកឈ្មួញ កំពុងធ្វើសកម្មភាពដឹកជញ្ជូនរាល់ថ្ងៃចេញ ពីតំបន់អភិរក្សមេម៉ង់នោះដែរឬទេ? សកម្មភាពនៃការដឹកជញ្ជូនឈើរបស់ឈ្មួញម្នាក់នេះ ត្រូវគេអះអាងថា គ្មាននរណាហ៊ានក្បែរនោះឡើយ។ពីព្រោះលោកមានអំណាចនិងខ្សែរយៈធំខ្លាំងណាស់។
បុរសដែលមានឥទ្ធិពល និងអំណាចខ្លាំង ដឹកឈើជាន់ផ្អៀង ខេត្តមណ្ឌលគិរីសព្វថ្ងៃនេះមានឈ្មោះហៅក្រៅថា បង ឆាយ ហើយ គាត់ជាអតីតជាមន្ត្រីបម្រើការងារ នៅអគ្គិសនីខេត្តមណ្ឌលគិរី ដែលត្រូវគេបណ្ដេញ បើតាមប្រភពប្រាប់ថា បើទោះបីជាគាត់ដឹកឈើទាំងថ្ងៃ ក៏គ្មាននរណាហ៊ានសួរនាំ ឬហ៊ានដើរក្បែររថយន្ត Lexus 470 នោះដែរ។
ប្រភពព័ត៌មានបានរាយការណ៍ឲ្យដឹងថា រថយន្តម៉ាក lexus 470 ពាក់ផ្លាកលេខភ្នំពេញ2AB -4126 ដែលមានភិនភាគដូចរូបភាពខាងលើ គេកត់សម្គាល់ឃើញបើកឆ្លងកាត់តាមផ្លូវពូត្រុំ មួយថ្ងៃ២ជើង និងពេលខ្លះរហូត ដល់៣ជើង ហើយដឹកស្ទើរពេញពី១ខែទៅ១ខែ។ ប្រភពរាយការណ៍បន្តថា សូម្បីតែនៅក្នុងឱកាសពិធីបុណ្យចូលឆ្នាំប្រពៃណីជាតិកាលពីខែមុននោះ ក៏រថយន្ត១គ្រឿងនេះមិនសម្រាកនោះដែរពោលគឺបន្តដឹកឈើជារៀងរាល់ថ្ងៃ។ រីឯមន្ត្រីមានសមត្ថកិច្ចនៅតាមដងផ្លូវ ជាពិសេសស្ថាប័នជំនាញក៏ត្រឹមតែបានលូកដៃ ទទួលយកលាបសក្ការៈពីឈ្មួញម្នាក់នេះជារៀងរាល់ថ្ងៃនោះដែរ។
ប្រជាពលរដ្ឋរាយការណ៍ថា វាជារថយន្តដឹកបទល្មើសព្រៃឈើចេញពីតំបន់អភិរក្សមេម៉ង់ ឆ្ពោះមកក្រុងសែនមនោរម្យ ដោយយកទៅទម្លាក់នៅទីតាំងផ្ទះមួយកន្លែងដូចឃើញក្នុងរូបភាពនេះ ស្ថិតនៅចំណុចខាងក្រោយវត្តលើ ក្នុងភូមិពូត្រុំ សង្កាត់មនោរម្យ ។ ការដឹកជញ្ជូនឈើត្រូវបានរឹតបន្តឹងនៅក្នុងខេត្តមណ្ឌលគិរី ប៉ុន្តែសម្រាប់រថយន្ត១គ្រឿងនេះត្រូវគេប្រាប់ថា គ្មានសមត្ថកិច្ចណាហ៊ានប៉ះពាល់ឡើយ ដោយសារតែគេយកស្បែកខ្លា នៅស្ថាប័នយុត្តិធម៌មកប្រើបាំងពាសពីខាងក្រៅ។ នេះគឺជាអំណាចនិងឥទ្ធិពលរបស់លោកឆាយ ដែលគេអះអាងថា គ្មាននរណាហ៊ានក្អកនោះទេ។ ប្រភពខ្សឹបថា ជារឿយៗលោកឆាយ មានវត្តមាននៅទីតាំងផឹកស៊ីជាមួយអ្នកកាងនោះទៀតផង។
ទោះជាយ៉ាងណាអង្គភាពសារព័ត៌មានយើងបានសុំការបំភ្លឺ ពីប្រធានដែនជំរកសត្វព្រៃភ្នំព្រិច លោក ព្រហ្ម វិបុលរតនៈ លោកបានប្រាប់អ្នកសារព័ត៌មានយើងថា គាត់ទើបតែទទួលដំណឹងបានពីរបីថ្ងៃនេះទេ ពីប្រធានមន្ទីរថាពិតជាមានការដឹកជញ្ជូនខុសច្បាប់មែន លោកនឹងព្យាយាមតាមដានសភាពការណ៍ទប់ស្កាត់ និងមានវិធានការណ៍ ទៅតាមផ្លូវច្បាប់ឲ្យខានតែបាន។
ទោះយ៉ាងណាក៏ដោយប្រជាពលរដ្ឋ រំពឹងថា គណៈកម្មការជាតិបង្ក្រាបបទល្មើសធនធានធម្មជាតិ នាយឧត្តមសេនីយ៍ សៅ សុខា ក៏ដូចជាអភិបាលខេត្តមណ្ឌលគិរី លោកថងសាវុន ដែលជាអ្នកប្រតិបត្តិការនៅនឹងកន្លែង នឹងពិនិត្យមើលករណី បុរសជើងខ្លាំងឈ្មោះឆាយនេះផងទាន ពីព្រោះបើអាងទៅលើសមត្ថភាព មន្ត្រីជំនាញនៅតាមដងផ្លូវពីមេម៉ង់ មកក្រុងសែនមនោរម្យ គ្មាននរណាហ៊ានក្អកជា មួយមេឈ្មួញចាស់វស្សាទេ។ មិនហ៊ានក្អក ក៏ព្រោះតែបានលាភសក្ការៈបន្តិចបន្តួចផង ជាមួយនឹងការគំរាមកំហែងរបស់លោក ឆាយ នោះផង។ ប្រជាពលរដ្ឋសង្ឃឹមថា ព្រៃឈើដែលនៅសេសសល់និងនៅបន្តគង់វង្ស៕
