មានករណីគ្រោះថ្នាក់ចរាចរណ៍មួយកើតឡើង នៅលើផ្លូវព្រះសុរាម្រឹត (មាត់ទន្លេ) ត្រង់ចំណុចមុខសាលាខេត្តក្រចេះ ស្ថិតក្នុងភូមិក្រចេះ សង្កាត់ក្រចេះ  ក្រុងក្រចេះ

ក្រុងក្រចេះ ៖ នៅវេលាម៉ោង២២:០០នាទីថ្ងៃទី១៥ ខែមេសា ឆ្នាំ២០២៤ មានករណីគ្រោះថ្នាក់ចរាចរណ៍មួយកើតឡើង នៅលើផ្លូវព្រះសុរាម្រឹត (មាត់ទន្លេ) ត្រង់ចំណុចមុខសាលាខេត្តក្រចេះ ស្ថិតក្នុងភូមិក្រចេះ សង្កាត់ក្រចេះ  ក្រុងក្រចេះ ខេត្តក្រចេះ  រវាងរថយន្តនិងម៉ូតូ (ច្រាស់ទិសគ្នា)បង្កដោយរថយន្តម៉ាកRX.400h ពណ៌ទឹកមាស ពាក់ស្លាកលេខភ្នំពេញ2Z.9008 បើកបរដោយឈ្មោះ រុន ចាប ភេទប្រុស អាយុ 31 ឆ្នាំ ទីលំនៅភូមិ ស្រែតាហែន ឃុំសំបុក ស្រុកចិត្របុរី ខេត្តក្រចេះ បើកបរក្នុង (ស្ថានភាពស្រវឹង) បើកបរពីទិសខាងត្បូង ទៅទិសខាងជើង លុះមកដល់ចំណុចកើតហេតុខាងលើ បានបុកនឹងម៉ូតូ០១គ្រឿង ម៉ាកឌ្រីមC.125  ពណ៌ខ្មៅ ពាក់ស្លាកលេខក្រចេះ1F.0706 បើកបរដោយឈ្មោះ សាន សុផល ភេទប្រុស អាយុ៣៥ឆ្នាំ (របួសស្រាល)  និងអ្នករួមដំណើរឈ្មោះ ឈឹង ស្រីរ៉ាន់  អាយុ៤២ឆ្នាំ ត្រូវជាប្រពន្ឋ (របួសធ្ងន់) និងឈ្មោះ សាន កក្កដា ភេទស្រី អាយុ ១៨ឆ្នាំ ត្រូវជាប្អូន (របួសធ្ងន់) អ្នកទាំងបីនាក់មានទីលំនៅភូមិអូរឫស្សី២ សង្កាត់អូរឫស្សី ក្រុងក្រចេះ ខេត្តក្រចេះ  បើកបរពីទិសខាងជើងទៅទិសខាងត្បូង (បត់ឆ្វេងត្រឡប់ក្រោយ)។ ក្រោយកើតហេតុ ឈ្មោះ រុន ចាប បានបើកបររថយន្តគេចខ្លួនឆ្ពោះទៅទិសខាងជើង ហើយសមត្ថកិច្ចបានតាមស្រាវជ្រាវរកឃើញ និងបាននាំខ្លួន រួមទាំងរថយន្ត មកសួរនាំនៅជំនាញនៃអធិការដ្ឋាននគរបាលក្រុងក្រចេះ។បច្ចុប្បន្នជនរងគ្រោះត្រូវបានសង្រ្គោះយកទៅព្យាបាលនៅមន្ទីរពេទ្យ ចំណែកអ្នកបើកបររថយន្ត និងមធ្យោបាយទាំង០២គ្រឿង ត្រូវបានឃាត់ និងរក្សាទុកនៅ អធិការដ្ឋាននគរបាលក្រុងជាបណ្ដោះអាសន្ន ដើម្បីបន្តតាមនីតិវិធី។