រតនគិរី ៖ ពលរដ្ឋនៅស្រុកអូរជុំជាង៣០០គ្រួសារ បានប្រតិកម្មជាខ្លាំងទៅលើលោក អៀម អឿនប្រធានមន្ទីរអភិវឌ្ឍន៍ជនបទខេត្តរតនគិរី ដែលបានច្រានចោលលុយពួកគាត់ជាង៧លានរៀលមកធ្វើជួសជុលផ្លូវប្រវែង៧០ម៉ែត្រនៅឃុំចាអ៊ុង ស្រុកអូរជុំ ខេត្តរតនគិរី តែលោក អៀម អឿន បែជាថាលុយរបស់គណៈកម្មាការអភិវឌ្ឍន៍ភូមិទៅវិញ។
ប្រភពពីពលរដ្ឋដែលចូលរួមធ្វើផ្លូវបេតុងនៅស្រុកអូរជុំ បានប្រតិកម្មទៅលើខ្លឹមសារបំភ្លឺ របស់លោកអៀម អឿន ប្រធាមន្ទីរអភិវឌ្ឍន៍ជនបទខេត្តរតនគិរី បានច្រានចោលសាច់ប្រាក់ជាង៧លានរៀលបានមកពីពលរដ្ឋរ៉ៃគ្នាយកទៅធ្វើផ្លូវបេតុងប្រវែង៧០ម៉ែត្រនៅស្រុកអូរជុំ លោកបានបំភ្លឺទៅកាន់អ្នកសារព័ត៌មានថា ជាលុយរបស់គណៈកម្មាកាអភិវឌ្ឍន៍ភូមិទៅវិញ ទាំងដែលប្រជាពលរដ្ឋបានសហការគ្នាប្រមូលលុយ និងកម្លាំងពលកម្មជួយគ្នាជួយជុលផ្លូវកន្លែងណាដែលពិបាក ពួកគាត់ជួយគ្នាជួសជុលដោយខ្លួនឯង។
ប្រភពបានបន្តថា ប្រសិនបើជាលុយរបស់មន្ទីរអភិវឌ្ឍន៍ជនបទខេត្ត ហេតុអីបានជាមិនជួលគេជួសជុលទៅ ម្តេចបានមានតែប្រជាពលរដ្ឋសហការគ្នាចាក់បេតុងខ្លួនឯងទាំងអស់ចឹង?
គួរបញ្ជាក់ថា កាលពីថ្ងៃទ២៨ ខែធ្នូ ឆ្នាំ២០២៣លោក អៀម អឿន ប្រធានមន្ទីរអភិវឌ្ឍន៍ជនបទខេត្តរតនគិរី បានចេញសេចក្ដីស្រាយបំភ្លឺថា តាមពិតលុយដែលធ្វើផ្លូវបេតុងប្រវែង៧០ម៉ែត្រនៅស្រុកអូរជុំនោះគឺជាលុយរបស់គណ:កម្មាធិកាអភិវឌ្ឍន៍ភូមិទេគេឱ្យយកទៅសាងសង់ផ្លូវដើម្បីសម្រួលការធ្វើចរាចរណ៍ជាបណ្ដោះអាសន្ន។
តបនឹងការបំភ្លឺខាងលើនេះ អ្នកស្រី វីន សុត មេភូមិចាអ៊ុងកៅ និងជាប្រធានគណ:កម្មាធិការអភិវឌ្ឍន៍ភូមិបានបញ្ជាក់ថា កាច្រានចោលរបស់លោកអៀម អឿន នោះពុំត្រឹមត្រូវឡើយព្រោះថា គណ:កម្មាធិការអភិវឌ្ឍន៍ភូមិ មានតែឈ្មោះពុំមានលុយសម្រាប់ចូលរួមធ្វើផ្លូវបេតុងនោះទេ អ្នកស្រីបានបញ្ជាក់បន្ថែមថា លុយដែលធ្វើផ្លូវបេតុងនោះផ្ដើមចេញពីតំណាងប្រជាពលរដ្ឋសុទ្ធសាធ ហើយពួកគេក៏មិនមែនជាសមាជិករបស់គណ:កម្មាធិការរអភិវឌ្ឍន៍ភូមិឡើយ ចំពោះការរ៉ៃលុយនេះមេភូមិ និងមេឃុំអត់បានចូលរួមទេ ដោយសារតែផ្លូវនោះបានខូចជាយូឆ្នាំហើយពុំមានអ្នកជួសជុល ដើម្បីសម្រួលដល់ការធ្វើដំណើររបស់ពួកគេទើបពលរដ្ឋស្រាក់លុយនាំគ្នាធ្វើទៅ។
លោក ភួយ វណ្ណា តំណាងពលរដ្ឋបានបញ្ជាក់ដែរថា ពួកគាត់អស់សង្ឃឹមមិនគួរលោក អៀម អឿនច្រានចោលទឹកលុយជាង៧លានរៀលដែលជាញើសឈាមពួកពួកគាត់ខំរកហើយបេះពីមាត់ពីករមិនហ៊ានស៊ីចាយទេ ដើម្បីយកទៅធ្វើផ្លូវឱ្យបានល្អបែរជាលោកប្រធានបដិសេធចោល។
លោកបានបន្ថែមថា ដើម្បីរកឱ្យឃើញការពិតសូមលោក អៀម អឿន បង្ហាញឯកសាររបស់គណ:កម្មាធិការអភិវឌ្ឍន៍ភូមិដែលបានចំណាយលុយធ្វើផ្លូវបេតុងប្រវែង៧០ម៉ែត្រនេះ គឺយកឯកសារមកដាក់នៅលើតុបង្ហាញមហាជនឱ្យបានឃើញទាំងអស់គ្នា។ បើមិនមានឯកសារទេគឺលោក អៀម អឿន កំពុងតែព្យាយាមបកស្រាយកុហក់ថ្នាក់ដឹកនាំ និងមាក់ងាយដល់ជីវភាពប្រជាពលរដ្ឋដែលមានចិត្ដចូលរួមចំណែកជាមួយរដ្ឋាភិបាលក្នុងការធ្វើផ្លូវនៅមូលដ្ឋានដើម្បីសម្រួលការធ្វើដំណើររបស់បងប្អូននៅទីនោះហើយ។
លោក ភួយ វណ្ណា តំណាងពលរដ្ឋបានបន្តថា រឿងនេះលោក អៀម អឿន ត្រូវតែធ្វើការសុំទោសប្រជាពលរដ្ឋជាង៣០០គ្រួសារជាសាធារណ:បើពុំដូច្នេះទេតំណាងពលរដ្ឋ និងបន្ដរកយុតិធម៌តាមរយ:ឱ្យមេធាវីជួយធ្វើពាក្យបណ្ដឹងដាក់ទៅអាជ្ញាធរពាក់ព័ន្ធដើម្បីដោះស្រាយតាមផ្លូវច្បាប់។
ប្រជាពលរដ្ឋជាង៣០០គ្រួសារដែលចំណាយលុយផ្ទាល់ខ្លួនដើម្បីធ្វើផ្លូវបេតុងសុំសំណូមពរដល់ដ្ឋមន្រ្ដីក្រសួងអភិវឌ្ឍន៍ជនបទ ឯកឧត្តម ឆាយ ឬទ្ធីសែន មេត្តាជួយចាត់មន្ត្រីឱ្យចុះទៅដល់ទីតាំងធ្វើការត្រួតពិនិត្យ ដើម្បីរកឱ្យឃើញកាពិត តើពលរដ្ឋនិយាយកុហក់ ឬក៍ប្រធានមន្ទីរអភិវឌ្ឍន៍ ជាអ្នកបកស្រាយកុហក់មហាជននិងថ្នាក់លើរបស់នោះ? កាលពីកន្លងមកយើងបានសង្កេតឃើញថាលោក អៀម អឿន ពុំដែលចុះពិនិត្យមើលផ្លូវ ឬតំបន់ណានៅក្រោមការគ្រប់គ្រងរបស់លោកនោះទេ សូម្បីតែខលទូរស័ព្ទដើម្បីទំនាក់ទំនងសុំការសហការក៏ពិបាកដែរ គឺលោកមិនលើកទូរស័ព្ទ៕
ពាក់ព័ន្ធនិងករណីខាងលើនេះអង្គភាពខ្មែរឦសានយើងខ្ញុំមិនបានទំនាក់ទំនងសុំការបំភ្លឺពីលោក អៀម អឿន បានទេព្រោះមិនមានលេខទូរស័ព្ទដើម្បីទំនាក់ទំនង។
តែទោះជាយ៉ាងណាអង្គភាពរបស់យើងខ្ញុំនៅតែរង់ចាំការបកស្រាយ និងបំភ្លឺពីគ្រប់ភាគីដែលពាក់ព័ន្ធ គ្រប់ពេលនិងម៉ោងធ្វើការ។